الأربعاء، 24 يوليو، 2013

ولا دمعة




لما تنام ودموعك على خدك ..

لما تلاقي الدنيا دايما ضدك ..

لما يكون سبب دموعك مش حاسس بيك ..

ويزيد القسوة شوية ولا عارف ايه فيك ..

ولو يعرف هيزيدها كمان ..


يبقا دموعك دى تخبيها ولا دمعة قدامه تباان ..

ولا احساسنا فى يوم نحكيه .. ولا نتحايل نلقــى حنــان ..

الثلاثاء، 23 يوليو، 2013

ساعات بشتاق

ساعات بشتاق ..

لكلمة سمعتها منك ..
لغنوة قولتها بصوتك ..

ساعات بشتاق ..

ل سماع دقات قلبك ..
ل رقصة سلو جوة حضنك ..

ساعات بشتاق ..

ل كلامي ليك .. وكلامي معاك .. وكلامك ليا ..
لشوق فى عينيك .. ونظرة لهفة .. وحنية ..
وراحوا فين !! صحيح خلاص مبقوش ليا ..

ساعات بشتاق ..

يرجع تانى بيا العمر ..
ليوم قبل اما اشوفك
لا كنت جرحت
ولا دوقت المر ..

ساعات بشتاق ..

وشوقي بيموتنى بجد ..
مش قادرة ارجعلك من تانى ..
خلاص بيننا بنيت حيط سد ..
-؛-؛-؛-؛-؛-؛

الاثنين، 22 يوليو، 2013

حنيــن



حنيــن .. لزمــان 

حنين لأصحاب فرقت بيننا السنين والمسافات ..
حنين لدنيا عشتها ويارتني مافارقتها ..
حنين لماضي انه يرجع ومعملش حاجات كتير ندمت عليها النهاردة ..
حنين لطفولــة كنت فاكرة انى معيشتهاش .. بس طلع مفيش أجمل منها ..
حنين لرسوم متحركـة مهما شوفناها دلوقت مش هنحس بحلاوتها زى زمان ..
حنين لكشكول وقلم .. لـ جلاد اخضر واحمر واصفر :)
حنين لـ لعبة الأولى ويَـا صحابنا ..

حنيــن لذكريــات جميــلة هنحكيها لأولادنا ونخليهم يصنعوا ذكريات أجمل منها ان شاء الله ^_^ 

السبت، 20 يوليو، 2013

حنيت



















ولا لحظة فى عمري اتخيلت ..
انى ابعد وانك تقبل ...
خليتنى فجأة استسلمت ..
لدموعى واقرر ارحل ...


وتبعد عنى وابعد عنك ..
قولت اكيد مش هتقدر ...


وفكرة اننا نتفارق .. 
قولت مستحيل تتحمل ...
-؛-؛-؛-؛-؛-
بس اتاريه مش فارق عنده ..
ابعد يوم ابعد شهر .  ولا ابعد خالص عنه ..


عنده اللى يملى مكانى .. من قبل اما يفضى اساسا ..
خليه يحط نفسه مكانى .. ولا يوم هيجرح كيانى ..


ودلوقت بعد اما لقيته مش فارق عنده .. 
لقيت حنيني بيقتلنى ..
لماضي عشته .. ولوقت حبيته .. ولدمعة نزلت بسببه
حنيت لخناقي معاه .. حنيت لكلامنا وضحكنا
حنيت وقلبي اشتاقله ..
بس انا قلبي ده مكتوبله ..
ان الفرحة ما تتحققله ..
لا قادرة استحمل بعده .. ولا قربه قادر يسعدنى ..

وهفضل أحن وأحن .. وقلبي يدوب ويشتاقله ..

الجمعة، 19 يوليو، 2013

عادي





لما تحب حد من قلبك ويبيعك ^عادي^..



لما توفي وتخلصله ويسيبك ^عادي^..



تفديه بحياتك لو يطلب



ويجيلك يرسملك حبه



وحياته هتكون ويآك..



و ف ثانية تلقى أحلام
ك ضاعت والدنيا ف عينك خلاها هلاك..


فجأة حياتك كانت وردة ذبلت وإتقلبت أشوآآك..



لما تحب الناس من قلبك ويغدروا بيك .. قول ده عآدي



لما تعز أصحابك أوي وتلاقي معاملة قاسية ليك .. حتى ده 

عادي



مين دلوقتي بيقدر حبك ومشاعرك غير ناس قليلين .. ماهو كله في الدنيا دي بقى اصلا" عاآآدي..،

الخميس، 18 يوليو، 2013

يارب






عندي يقين يارب .. بأنك مش ناسيني ..

ومهما مين آذانـي .. برحمتكـ حاميني ..

ولو حتى ايه حصللي .. ولو حتى ايه جرالــي

دايماً معايا فى ضهري .. ودايماً مقــوينـي

ناس بتبعد وتقرب .. وناس بتجرح وتطبطب

وناس مش قادرة تسامح .. وناس ملهاش ملامح

والدنيا ماشية بينا .. بتجيبنا وتودينا

وكلنا بنحاول .. نعمل إللي عليــنا

ورحمتك يارب واسعة .. و دايماً بتنَـجيـ
نا 


ولا بتسيب فى يوم جارح .. وتاخد حقنا وأكتر

وإحنا نغلط وتسامح .. وبكرمك يارب تغفر


13-4-2013

ضيـاع (17)



أنا وردة تايهة فى وسط بحــر  
خدتها موجـة رميتها جــوة أعماقـه
فضلـت تتخبط من رمــل لـ صخـر 
شـافوهـا الناس .. ولا هامهم لا الورد ولا أوراقــه ..

الأربعاء، 17 يوليو، 2013

فالصو (16)


والله زماااان
لما كان فيه آماااان ..


كنت تسيب اسرارك مع صاحبك
ومفيش فى بالك غدر منه .. ده كان زماان


كنت تآآمن لحبيبك من ورا ضهرك مش هيخونك
كنت تدي ومتستناش مقابل

دلوقت مين بيدي الآمان لغيره !!
مين بيحكى لصاحبه سره بكل ثقة انه مفيش غدر منه !!
مين حبيبه مش بيخونه من وراه ولو بنظرة على حد تانى !!!
مين بيدي من غير مقابل .. مين بيعطف من غير  مايكون ليه مصلحة ..

كله فالصوووو والناس الطيبة خلصوا 
!!!!!

الاثنين، 15 يوليو، 2013

جرب احساسي (15)

عارف .. لما تقول لحبيبك انه كل ما ليك ..
لما تقوله دى حياتي مش هتكون إلا بيك ..
وتقوله مهما تعمل فيا روحي فيك ..
مهما ألاقي حواليا ناس بعشق لمسة إيديك ..
وهو مش حاسس بكلام عينيك ..

لما تضحي عشانه بكل اخلاص
لما يكونلك اغلى واعز الناس
لما توهبله كل مافيك من مشاعر واحساس
وتلاقيه على قلبك بكل سهولة داس

لما تقول عايز عمري اعيشه معاك
وكل حياتي ديا فداك
وكل الدنيا ماتسوى بلاك
وكل العالم يجي ايه فى هواك

وحبيبك دايما ينساك
لما تعيش علشان ترضيه
لما تعشق حضن عينيه
وتتمنى كل لحظة تحضن ايدك ايديه
وتحس انك ولا حاجة بالنسبة ليه
وكل حبك وحنانك بيهون عليه ..

ياريت لما تجرب احساسي .. تقوللي عملت ايه!¡!¡! 

يأس (14)

السبت، 13 يوليو، 2013

وحشتنى نفسي (13)


وحشتنى ايام كنت فيها كويسة ..
كنت فرحانة و من قلبي بضحك ..
وحشتنى نفسي ايام زمان
كنت فرفوشة ومرحة ..
كان قلبي صافي وطيب
لا كنت بكره ولا قلبي يحقد ..
ولا كنت بغلط .. ولا قلبي يجرح

ياريت يا زمان ترجع بيا .. 
ولا تجيبلى فرحتى اللى اتسرقت مني .. :/


ضحكة تفرحنا (12)


على مدار سنين عمرنا 
لازم تقابلنا صورة بنتصورها 
شخصية او جماعية
ودايما بنحاول نضحك فيها 
على رأي اللى قال ( اضحك الصورة تطلع حلوة )
بس مين بياخد باله من كل واحد فيها 
ضحكة تخبي ألم جواه
ضحكة شايلة من حد
ضحكة مخنوقة وبتداري
ضحكة من الفرحة فيها دموع
ضحكة وضحكة وضحكة .. 
ومحدش داري وراها ايه
ان كان الم وللا فراق 
ولا غياب حبيب
ولا اختناق
بنضحك علشان نسيب ذكرى حلوة ..
نفتكرها مع الزمن
اصلنا ممكن بعد مدة كبيرة 
ننسى سبب خنقتنا وتفضل الصورة 
ولو كشرنا هنرجع نفتكر الم فات
ولو ضحكنا هنضحك تانى لما نشوفها  :)
يبقى خلينا نداري على ألمنا بالضحكة 
يمكن الضحكة نفسها تفرحنا ^_^

موجة وهم (11)


غدار وبعشقه .. رائع جماله وبخافه .. 
صعب تكون صفات متناقضة متجمعة فى حد او شئ بتحبه جدا ..
وهو ده حبي للبحر .. 
بحبه جدا وبخاف منه جدا جدا  .. 
بحب اروحله واشوفه واتصور معاه و المسه ..


 نفسي اقرب اكتر بس بخاف ..
اوقات بحس ان لازم علاقتى بالناس تكون زى علاقتى بالبحر .

. حب من بعيد لبعيد علشان مغرقش ..
 متجيش موجة اوهام من حد تاخدنى لأعماق أوهامي ..
 ولا اشوفش النور من تانى ..

الجمعة، 12 يوليو، 2013

رمضان كريم (10)

رمضان كرييييم .. وكل سنة وانتم طيبييييين
رمضان يجمعنا ♥

شهر رمضان ده شهر لا يوصف .. شهر الخير والبركة ..
 شهر المغفرة والحسنات ..
من فضل ربنا وكرمه علينا انه خلقلنا الشهر الكريم ده ..
 لأننا كده كده فرض علينا كل حاجة بنعملها فى رمضان فى غيره كمان ..
بس ده فضل ربنا علينا بجد ..


بس ياريتنا اللى بنعمله فى رمضان نعمله ف  السنة كلها لان ربنا هو واحد 
بس للاسف تلاقي واحدة اتحجبت فى رمضان وقلعت الحجاب بعده ..
 واللى متحطش ميكب فى رمضان وتحط بعده او لما تفطر ..
 واللبس الديق هو هو  متغيرش ..
 مين قال ان الصيام عن الاكل بس ..
الصيام ده عن كل حاجة ..
عن كل الغلط والذنوب ..
 عن اللبس والنظر والكلام و كل حاجة ..
.ولا المسلسلات اللى بيتعمدوا يعملوها فى رمضان ..
 وعن ان لاااازم اى مسلسل فى رمضان يظهر فى مناظر و اشكال تفطر الصايم ..
 وعن ان لازم لازم كأنه فرض ان يطلع رقاصة فى مسلسل فى رمضان ..
سبحان الله ..
 ربنا يهدينا جميعا  ياااارب 
ويباركلنا فى رمضان 

الاثنين، 8 يوليو، 2013

الأمل


....بيعود تانى الأمل .. وبعيش تانى حياه....
....وبتعود تاني السعادة ..و أكيد هلاقيها معاه....
....إحساسي ده بيخليني..تملي افرح فى لقاه....
....وقلبي بيفرح معايا .. وبحس بالآمان....
....وليه ياقلبي متفرحش .. وانت لقيت الحنان....
....واديك يا قلبي هتحب .. وهيضحك تاني الزمان....
....منا قلتلك متخافش .. هتلقالك فى الدنيا مكان ....


**********
22/3/2008

الأحد، 7 يوليو، 2013

آدي النهاية




قربت
اخاف على  عمري يتسرق منى ..

قربت اقول خلاص كفاية يا عيونى لا تحني ..
خلاص يادموعي كتر العذاب جنني..


قرب يفوتنى قطر الحياه ..

ولا حسيت بيه كأن السنين راحت ف سنة ..


قرب يموت احساس جميل جوايا

قربت اقول نزل الستار وآدي النهاية ..

السبت، 6 يوليو، 2013

بقايا حطام

بقايا حطام هي حياتى ..
تركوني ورحلوا الى عالم اخر ..
اردت الذهاب معهم لكن لم استطع ..
فرقتنا الأيام .. فرقنا الصهيون والعدوان ..
لم أجيد سوى الهرب عندما رأيت المدافع والطلقات تتعالى اصواتها ..

وجدت لنفسي مخبأ لصغر حجمي ..
أمضيت بقية حياتى فى حطام ..
أحلامى كانت لم تتعدى لعبة وفيلم كارتون وطفل سعيد بين أسرته يمرح ..
انتشلوهم منى .. انتشلوا سعادتى ..
لم يتركوا لي سوى ألمي ..
و أملي ان الملم ما بقي منى لأبدأ من جديد ..


الجمعة، 5 يوليو، 2013

الشك (9)

و آدي حكايتها .. بتتكرر تانى 
قدام عينها .. وساكتة وبتعاني 
ولا بإيديها تقول كفاية .. ولا تتأكد من شكوكها
بس بجد الحيرة تجنن .. كل الأدلة بتقول ده صح ..
بس مفيش دليل قاطع .. 

واديها بتحكي يمكن تعبر عن شوية جواها .. 

***


بلاقيهم يفتحوا مع بعض .. ويقفلوا مع بعض ..


أكلمها .. يخاصمنى .. أخاصمها .. يكلمنى ..

والشك بيقتل .. بيموت .. وبيدبحني ..

اللى كان زمان معايا .. دلوقت شكوكي بتقول انه معاها 
ومين خلاه يعرفها .. غبائي وسذاجتى ...

خلتني اتخيل ان فى أصحاب مخلصين لحد دلوقت ..

جنونى اللى خلانى أعيد نفس الغلطة باختلاف الشخصين ..

مانا اصلا عايشة فى عالم مش عالمي ..

انا ليا دنيتي الخاصة .. 

ومحدش عمره هيفهمها .. 

انا عندى محدش يفهمها .. احسن ما يفهمها ويهملها .. 

لو شكي ده حقيقي .. ليه مقالوش ...

هبعد عنهم .. بس يقولوا ..

انا مش عاوزة حد معايا غصب عنـه .. ولا عاوزة كدب .. كفاية .. منها ومنـه

والصراحة راحـة .. زمان قالوها ..

وانا مش هزعل .. ده انا هرتاح .. من هموم كتير شايلاها 

فاكرين بوجودهم عايشة فى جنــة .. وانا ولا بتمنى .. 

تعبت تعبت كفاية بجد .. .. ولا قادرة استحمل نفاق من حد 



كام لحظة حلوة


* من صغري بحلم بكل يوم جاى فى حياتى ..
بحلم احلام كان نفسي احققها ..

* وانا فى ابتدائي حلمت اطلع دكتورة ..
 * دخلت اعدادى كان نفسي اطلع ممثلة او مغنية ..
وكان نفسي اكتب شعر بس مكنتش بعرف..
 * طلعت ثانوى .. كان نفسي ادخل كلية طب .. او اداب علم نفس جداا .. وكان نفسي امثل و اغني بردو .. 
وابتديت اكتب شعر عامي فى ثانوى ..

* كان نفسي اعيش قصة حب ولا فالخيال .. واما اعيشها اتجوز اللى بحبه ونعيش احلى حياة .. يعمل كل اللى يقدر عليه علشان يسعدنى .. وانا كمان اكيد ..كل حياتنا تكون سعادة وفرح ورومانسية .. صدق وامانة واخلاص ..
ومكنتش اعرف ولا كنت حاطة فى دماغي غير كده.. بس الواقع غير كده خالص .. الظاهر ان التمثيل اللى كان نفسي فيه خلانى افتكر انى فى فيلم رومانسي :-/ 

وفى ثانوى كنت علمي طبعا لانى كان نفسي ادخل طب بس انا مش بتاعة مذاكرة فطبعا حولت ادبي فى تالتة .. وقولت مادام مفيش نصيب فى طب ادخل اداب علم نفس ..
حظى بقى و قدر ربنا انى مجبش اداب فرق درجة باين .. ودخلت حقوق :-/
بس الحمد لله على كل حال ..
فكرت لما اخلص ادخل اداب بس العمر فى كام اربع سنيين .. 
الحاجة الوحيدة اللى بقى بالامكان انى احققها هى الكتابة .. حتى هى مش موقنة فيها اوى .. بس المحاولة احسن من مفيش ..

دلوقت نفسي اعمل كتاب لوحدى .. بعد ماشاركت فى كتابين جماعيين ..
دلوقت مبقتش متوقعة حياة رومانسية غير فى القصص والخيال اللى هكتبه .. دلوقت هكتب حاجات اكتر واحاول اعيش جواها .. يمكن  اعيشلى كام لحظة حلوة من اللى بتمناهم :) ..


الخميس، 4 يوليو، 2013

لسة ماعاش ولا كان


انا مش راح احكى 

ولا اقول مين غلطان
بس الزمن لما يدور 
هيبين مين ندمان
والدنيا دى صغيرة
وكما تدين تدان
وان كنت فى يوم غلطت
ده علشان اديت امان
ورضيت اعيش فى وهم 
ولحظات كتير حرمان
وانا هسكت واسيب الزمان
يلعب معاك لعبته
ويعرفك أد ايه ..
انك خسرت *حنان*
فى الدنيا مش هتعوضه
ولا هتلاقيه فى إنسان 
فاكرنى هزعل لفراقك 
وابكى من الاحزان
ده اللى يبكي عينيا
لسة ماعاش ولا كان
انا بس هبكي على قلبي 
اللى قاسى بسببي زمان
.....

لك الله يامصر

بصراحة الواحد مش عارف يقول ايه النهاردة ..
بس الحقيقي فعلا اننا مش هنتغير بتغيير  مرسي او غيره .. احنا مش هنتغير غير بتغير نفوسنا احنا ..
(ان الله لايغير مابقوم حتى يغيروا ما بأنفسهم)

ياريت الناس بقى كل واحد يشوف تصرفاته .. اللى بيشتغل يشتغل بضمير .. اللى مبيشتغلش يحاول تانى وتالت حتى لو بمرتب بسيط .. البداية مش لازم تكون كبيرة اوي .. ده فى ناس عندهم يبقوا عاطلين احسن ماياخدوا مرتب قليل ..
نفسي مصر دى ترجع زى زماااااان خااالص .. ايام جمال عبدالناصر كده .. ولا تقوللى حسنى ولا مرسي ..

بعون الله مصر هترجع شامخة .. بس لازم شعبها يبدأ بنفسه .. ويتقبض ع البلطجية .. و كفاية بقى قتل فى بعض .. واراقة دمااااء ..
كفاية يا ناس تقتلوا فى اخواتكم .. اهى حجتكم راحت خلاص ..

اما نشوف بقى هيحصل ايه ..

الثلاثاء، 2 يوليو، 2013

احلام معدومة

تعيسة .. بائسة .. كل ما في حياتى انما هو بعض 'أمل' فى أن احيا السنوات الباقية من عمري فى سعادة
ولكن لم تتحني الحياة فرصة لذلك ..
لم أختر شيئا" لنفسي  ..
بالكاد أختار طعامي  ..

وان اخترت القى االلوم من الجميع .. ومن ثم الندم والأسى ..
أحلامي مبعثرة .. تكاد ان تكون منعدمة التحقق ..

الاثنين، 1 يوليو، 2013

ونبدأ :)

عجبانى اوي فكرة التدوين اليومى لمدة عام فكرة تشجيعية جدا تجري القلم وتخليه يكتب لوحده كمان
وطبعا الصراحة هى خوفتنى فى الاول انى ممكن مقدرش وفى اكيد ايام هتوقع منى بس هنعمل اللى علينا
ومنها هنطلع بصحبة جميلة ومبدعين هنعرفهم زى كل حملة تدوين ..


*** 

دلوقت حبيت ابدأ بشئ من الأحداث الجارية
انا مش مؤيدة ولا معارضة .. انا حيادية اكتر ..

يؤسفنى جدا" حال شباب مصر المسلمين المنقسمين فى اراءهم لدرجة انهم ممكن يقتلوا بعض ..
ازاى بتهون علينا روح مصرية زينا واخواتنا ..
ازاى والشعب المصري معروف بجدعنته ووقوفه إيد واحدة جمب بعضه .. ومعروف بخفة دمه .. وشهامته ..
ازاى وصل الحال بينا لأن بنت يغتصبها مصري زيها ويقتلها ويرميها ..
راحت فين ايام زمان والامااان اللى كانوا عايشين فيه .. كانوا بيلبسوا ميني حيب ومحدش بيقرب ليهم .. كانت الالفاظ راقية فى الشارع المصري ..
دلوقت ايه جرالنا .. شباب بقى طول الوقت يشتم بأفظع شتايم واهانات .. ناس مبقتش طايقة بعض وبتتلكك لبعض على اى حاجة ..

واكتر ما اكرهه فى حياتى نقول اصل فلان السبب .. اهو بسبب الكلمة دى الفساد بيزيد لان كله بيرمى الذنب على حد تانى ..
لو كل واحد فينا بدأ بنفسه الدنيا هتتغير والحال هيتعدل ..
زمان كان المسلم والمسيحى بيدافعوا عن بعض وميرضوش الاهانة لبعض .. دلوقت المسلم بيقتل المسلم ومش بيهمه .. اهل اللى موته ده لو اتيتموا .. مين هيصرف عليهم ومين هيحميهم ..
ليه كل اهل ميهتموش بتربية شبابهم وميسبوهومش لغيرهم من اصحاب السوء والبلطجية والخناقات ..
ليه الأدب بيقل كل مدى اكتر واكتر ..
حتى البنات مش لاقيين اللى يلمهم .. فين الاهالى اللى بتسيب بناتها تنزل من بيتها وكل جسمها باين ومتحدد .. متقوليش تحرر بقى علشان ده قمة التخلف ..
راحت المبادئ هدر .. راحت مع اللى راحواااا وبنترحم عليها

ربنا يكرم اللى لسة عايشين بمبادئهم ومفيش حاجة بتأثر عليهم ..
ربنا يحفظ مصر ويرجع شعبها للصواب .. يارب

Template by:

Free Blog Templates